អន្តរជាតិ៖ របបយោធាមីយ៉ាន់ម៉ា បានអំពាវនាវឲ្យបេសកជនពិសេសរបស់ប្រធានអាស៊ានលោក ប្រាក់ សុខុន គួរកុំជួបជាមួយស្ថាប័នដែលប្រឆាំងរដ្ឋប្រហារកាលពីឆ្នាំមុន ដែលរបបយោធាបានប្រកាសថាជាក្រុម “ភេរវករ” ដែលផ្ទុយនឹងគោលការអាស៊ាន។

ក្រសួងការបរទេសមីយ៉ាន់ម៉ាបាននិយាយនៅក្នុងសេចក្តីថ្លែងការណ៍មួយថា «ក្រសួងកត់សម្គាល់ថាខណៈពេលដែលការពិភាក្សាមួយចំនួនមានលក្ខណៈស្ថាបនាលើការអនុវត្តការយល់ស្របប្រាំចំណុចនោះ សមាជិកពីរនាក់បានស្នើឱ្យប្រេសិតពិសេសឱ្យចូលរួមជាមួយសមាគម និងក្រុមភេរវករខុសច្បាប់»។

ក្រសួងដដែលនេះបានលើកឡើងថាការស្នើឱ្យបេសកជនចូលជួបជាមួយក្រុមដែលខ្លួនចាត់ទុកជាភេរវករបែបនេះ «មិនត្រឹមតែផ្ទុយនឹងគោលការណ៍នៃធម្មនុញ្ញអាស៊ានប៉ុណ្ណោះទេ ថែមទាំងធ្វើឱ្យប៉ះពាល់ដល់កិច្ចខិតខំប្រឹងប្រែងប្រឆាំងអំពើភេរវកម្មរបស់អាស៊ានផងដែរ»។

គួរបញ្ជាក់ថា មីយ៉ាន់ម៉ា មានវិបត្តិចាប់តាំងពីយោធាបានផ្តួលរំលំរដ្ឋាភិបាលជាប់ឆ្នោតកាលពីមួយឆ្នាំមុន ដោយជនស៊ីវិលជាង ១ ៥០០នាក់ត្រូវបានសម្លាប់នៅក្នុងការបង្ក្រាបប្រឆាំងនឹងពួកប្រឆាំងរបបយោធា នេះបើយោងតាមតួលេខដែលបានលើកឡើងដោយក្រុមសកម្មជនដែលមានមូលដ្ឋាននៅប្រទេសថៃ៕